Postoiro SCG é unha cooperativa dedicada á produción e comercialización de produtos hortícolas, situada no concello de Vilar de Santos, ao sur da provincia de Ourense.

No ano 1996 comezamos traballando con 5 hectáreas, froito da iniciativa de 7 socios da comarca da Limia co obxectivo de promover a introdución de novos cultivos nesta zona, centrada naquela época principalmente na produción de pataca e cereal. Neses primeiros anos, algúns destes socios estaban a producir cebola e decidiron seguir apostando e traballando para producir cebola e outros produtos da horta.

Na actualidade contamos con 42 hectáreas e producimos cebola; repolo rizado, liso e de corazón; cabaza, tanto violín como de “Samaín”; puerro; brécol; coliflor e, por suposto, pataca.

Do mesmo xeito que coa cebola, buscamos ter variedades autóctonas e facemos un manexo sostible, con rotación dos cultivos e sen apurar os seus ciclos.